Gen 41 | ATA | STEP | Xe ili'i no anu tauu ie tamei mukalu, la tatananu tuala ne Aixiputo ne muaipiepiena lexe anu mulai mo a mututulu no lexa Nailu pa'umele,

a 41:8Tan 2:2

b 41:40Apo 7:10

c 41:42Tan 5:29

d 41:54Apo 7:11

Genesis 41

Tatananu Tuala Muaipiepiena

1 Xe ili'i no anu tauu ie tamei mukalu, la tatananu tuala ne Aixiputo ne muaipiepiena lexe anu mulai mo a mututulu no lexa Nailu pa'umele, 2 la mumaisi'a ta kau muxatele tamei ta toxotoxoxa'a. Vasime'a ne muveli loxo 'o. Mo lovoxa'a misevile. Me'a no lexa mitelo mo a i'ani'ani ia'eia'e no lexa pa'umolu. 3 Xe ili'i la ta kau muxatele tamei la mitelo. Ane'i ta kau ane ne, alaalamane'isi, mo vasime'a ne mu'ita'itasi. Me'a no lexa xe mixali mutelo, la mitulu no pa'ume'a ane'i ane mixali mitelo tei. 4 Xe miavuti vaxa la mi'i'a ane'i ane mixali mitelo tei ne mukalusi. Tatananu tuala mumaisou aipiepiena ane ne xe mukuluke la mutulu.

5 Xe ili'i, la mulivu sou muai, la muaipiepiena la. No anu aipiepiena ane tameisou ne, la mumaisou uiti ngiangiaxu palepanu toxotoxoxa'a muxatele tamei no aiinu vilesisi. Uiti ngiangiaxu ne lingamo sou ivalitusou. 6 Xe ili'i la, la mumaisou uiti ne ngiangiaxu palepanu muxatele tamei no aiinu vilesisi muxali mutelo la, ia kisou ngialanusi. Palepalepanu ne kitukitusi xo atume ialuxu muili molu loxo no xalee lia ane aso utetelo no anu la muxutuxu. 7 Xe ane'i ta uiti ane ne, miavuti la mimalukusi'a ane'i ane ta toxotoxoxa'a e mixali mutelo tei ne. Xe tatananu tuala mukuluke la, la mutulu avile la sou tanu tema. La sou mulavu lexe anu muaipiepiena.

8 ^aXe mutulu no kakau la tanu laixe uasi. La sou mukala anaxu mulai noxi'a ta mitema sou lavulavu no tuala tila ne Aixiputo ne mo ta mitema ane milavu no anu alualu iouiou ne sou mine'e noxou mukalusi. Ta motu mine'e mixali noxou mukalu, la sou anu muvikalane'ixu aipiepiena noxou ne. Ia vile noxi'a ne umomomo sou ululusou aipiepiena tamei ne laaxu ulai noxou uasi.

9 Xe itema e sou usaxisaxila'u uaini ne muxavutala, la muvikalanu tatananu tuala ne aloxo 'o, “Vaimomo 'o eni apala'alixu lexe eni e'oxo susu vile. 10 No voxo ane nini la'iaxenei'a ta mitema sou xaixai noxine la mino'ixe noxou itema sou usaxisaxila'u la'ilalixene sou milai mi'unalailinexe no tani noxou itema sou xaixai uuli noxi'a ta mitema sou 'oto'oto. 11 La nexi noxou teai la teaipiepiena mukei. Ia aipiepiena noxixe noxou ne laaxu vilesisi uasi. 12 No nano no tani sou navunavu ne, maulusie Evalaio vile a nexi noxi'a texoo no nano ne. Anu uxoxoo noxou tila noxi'a ta mitema sou 'oto'oto sou isaxisaxila'u taasine. Maulu ne a uxoxoo noxou sou anu upalupalusou. Nexi noxou tevikalanuxu aipiepiena noxixe noxou, la anu mululusou laaxu aipiepiena noxixe vilevilesi ne mune'e noxixe. 13 Xe ili'i, la mimii ne muxali maninasou aloxo anu mulemolu lamana noxixe ne. Nini nelaalinexe noxou, la nelivunixo sou elivu elai no anu xaixai noxilo la, ia nelilixu itema sou usaxila'u la'ilalixene.”

14 Xe tatananu tuala ne Aixiputo mulomu aloxo ne, la mukalanu anaxuou Iosepu sou une'e noxou. Alaxu vilesisi 'o la milai milaanu Iosepu no nano no tani sou navunavu. Iosepu mulaa mukalu, la mulai sou musala saexu laxusou muxexe xe mutokolomo laixe. Xe ili'i la sou mino'u mulai noxou tatananu tuala.

15 Mulai muxali noxou, la sou anu muvikalanuxu aipiepiena noxou aloxo 'o, “Eai la eaipiepiena, ia evile sou ululusou noxilo uasi. Eni elavu xo mivikalaleli lexe nini nalavusou nalulusou aipiepiena laaxu.”

16 Xe Iosepu muavuti la muvikalanu tatananu tuala aloxo 'o, “Toxo tila, eni amomomo uasi, ia Lataua molusi ululusou aipiepiena noxine laaxu.”

17 Tatananu tuala muavuti la muvikalanuxu Iosepu sou aipiepienau aloxo 'o, “Eni eaipiepiena lexe, eni elai mo a atutulu no lexa Nailu pa'umele, 18 xe emalei la ta kau muxatele tamei ta toxotoxoxa'a, vasime'a ne muveli mo lovoxa'a misevile. Me'a no lexa mitelo mo a i'ani'ani ia'eia'e. 19 Xe ili'i la, la ta kau muxatele tamei la mixali mutelo. Ia ta kau ane ne vasime'a ne mu'ita'itasi mo alaalamane'isi. Eni alavusou amaisi'a ta kau se'i loxo ne lai 'o ne Aixiputo uasisi manina. 20 Ane'i ta kau ane ne miavuti vaxa la mi'i'a ane'i ane ta toxotoxoxa'a e emaisi'a tei. 21 Ia talavusou laixe uasi xo, mi'i'a loxo ne ia vasime'a uxali laixe uasi. Vasime'a mu'ita'ita mo alaalamane'i ne a uxoo nesi. Eaipiepiena aloxo ne xe ekuluke, la etulu.

22 Xe eai mulu'elai la, la eaipiepiena la. No anu aipiepiena ane ne, la emaisou uiti ngiangiaxu palepanu toxotoxoxa'a muxatele tamei no aiinu vilesisi. Uiti ngiangiaxu ne lingamo sou ivalitusou. 23 Xe ili'i la, la emaisou uiti ngiangiaxu palepanu muxatele tamei la, ia atume ialuxu muili molu no lia xalee ane aso utetelo no anu muxutuxu mole uleme laixe uasi, palepalepanu ne kitukitusi. 24 Xe ane'i ta uiti ane ne miavuti vaxa la mimalukusi'a ane ta toxotoxoxa'a e mixali mutelo tei ne. Ioxe, no kakau xe etulu, la ekalaa anaxoi'a ta mitema ane milavu no anu alualu iouiou ne Aixiputo sou mine'e sou ea'aloi'axu aipiepiena noxilo 'o, ia vile noxi'a umomomo sou ululusou laaxu noxilo uasi manina.”

25 Xe Iosepu muavuti la muvikalanu tatananu tuala ne Aixiputo ne aloxo 'o, “Aipiepiena tamei ne laaxu vilesisi. Lataua mulosienixu mimii ane anu u'oxonu uxali ili'i ane nemaisou. 26 Ta kau muxatele tamei ta toxotoxoxa'a mo vasime'a muvelisi mo lovoxa'a misevile ne mo uiti ngiangiaxu palepanu toxotoxoxa'a muxatele tamei nemaisou no aiinu vilesisi ne laaxu vilesisi lexe tauu ie muxatele tamei. 27 Xe ta kau muxatele tamei ane vasime'a mu'ita'ita mo alaalamane'isi ne mo uiti ngiangiaxu palepanu muxatele tamei ia kisou ngialanusi ne laaxu vilesisi lexe nenge ulai la taxolixu soli toxoxa'a tauu ie muxatele tamei. 28 Nalomu, aloxo elemolu noxine tei, Lataua mulosienixu mimii ane anu u'oxonu uxali ili'i ane nemaisou ne. 29 Ulai, la nenge nenge la'ilali piena misevile sou ta'ou no anu, no anu tauu ie muxatele tamei. Tuala xalee vile no ano no tuala tila ne Aixiputo 'o pa'usou uasi. 30 Xe ili'i no anu tauu ie muxatele tamei ne lexe ukalu, la nenge taxolu no anu tauu ie muxatele tamei sou soli toxoxa'a manina. Umomomo sou evile uxavutalanu tauutauu ie ane xoluxolu lailaixe ta mitema mixolu sou 'osa'ila no anu uasi, xo soli toxoxa'a ano 'o ne utaasinge mo u'oxo masuanenge ukalusi. 31 Umomomo sou ta mitema ixavutalanu tauutauu ie ane ane'i mixoxoolu la mi'o'ou la'ilali iouiou piepiena no anu la ua, xo soli toxoxa'a ane uxali noxinge 'o ne, utila manina misevile. 32 Lataua mulosienixu mii vile tatila no anu aipiepiena tamei xo anu umasaxa lexe nini nalavu no anu mii ane sou anu u'oxonu uxali manina. Mii ane ne a 'ala'alai sou uxali.

33 Ioxe, maasi la nini napasipaa mo nasosovosou itema vile ane xavutalau lailaixe mo mulavu laixe manina sou usaxila'u muamua'ixu xaixai no nano ne Aixiputo 'o. 34 Mo nasosovosi'a ta mitema se'i sou xaixai kalumo la sou isu'uli sou iiavelixu xoluxoluxa'a ta mitema laixe. Navikalane'i pekia'u lexe ino'u la'ilali noxi'a ta mitema no nano no anu tauu ie muxatele tamei ane asou nenge taxoo no anu tei 'o la, ikalipala'anu la'oluxu vile no anu la'oluxu ta'uve ne sou ilai i'unanu no taasou la'ilali no xalexalee tuala tila 'o ukalusi. Ka isaxila'u laixe. 36 La'ilali ane ne uai sou ta mitema i'ou no nano no tauu ie muxatele tamei sou soli toxoxa'a ane uxali noxinge lexe tauu ie muxatele tamei sou xoluxolu lailaixe mo la'ilali piepiena ukalu. Lexe nenge tamulinu xavutala ano 'o, la umomomo sou ta mitema isolixa'a uasi.”

37 Xe tatananu tuala ne Aixiputo ne, mulomusou xavutala ane ne la mutama pumuxu laixe no anu xavutalau, la sou ilo'a ta mitema ta tatila sou xaixai noxou mimasaxa lexe imulinu aloxo Iosepu mulemolu ne. 38 Xe anu muavuti la muvikalane'i ta tatila sou xaixai noxou aloxo 'o, “Nenge umomomo sou taxalisou itema vile laixe loxo Iosepu 'o uasi. Itema e Lataua uleenu muxoo noxou.”

39 Xe tatananu tuala muavuti la muvikalanu Iosepu aloxo 'o, “Eni elavu lexe Latauasi ane molu mulosienixu mimii ane nini nelemolu lexe uxali noxinge 'o, la sou anu lamanasi lexe ninisi ane nini namitema vile sou xavutala lailaixe mo nelavu laixe manina. Evile umomomo loxo nini uasi. 40 ^bEni emasaxa lexe eni asosovosine sou nini naxali loxo itema tila sou nasaxila'u taasilo. Mo ta mitema noxilo sou xalexalee tuatuala sou tuala tila 'o ne ilomuxenesi. No anu ualasi, eni tila noxine, ia nini nasaxila'u tuala tila noxilo lai 'o.”

Iosepu Usaxila'u Tuala Tila ne Aixiputo

41 La sou tatananu tuala ne Aixiputo muavuti la muvikalanu Iosepu aloxo 'o la, “Nalomu, vaimomo 'o eni amuxaxene sou nini naxali itema sou nasaxila'u xalexalee tuatuala no nano no tuala tila ne Aixiputo 'o ukalusi.” 42 ^cXe muavuti la mulaa ring no avolu simisou sou mulai mukelelixu noxou Iosepu avolu simisou. Ia ring ane ne, sosovo vile noxou tatananu tuala ne a muxolu no anu. Xe muavuti la mutokolomonu no anu tokolomo noxou laixe ka mutaa xapo xoulu vile vaxa no xolanu Iosepu. 43 Xe muavuti la mulosou karisi sou 'oto'oto noxou ane tameisou sou utavulenu. Ta mitema i'ava lexe, “Ngaxexesou vote'i! Ngaxexesou vote'i!” La sou musosovosou Iosepu sou muxali loxo itema sou usaxila'u xalexalee tuatuala no xalee lia tila ne Aixiputo ukalusi.

44 Xe tatananu tuala ne Aixiputo ne, muavuti la muvikalanu Iosepu aloxo 'o la, “Enisi eni tatananu tuala. Ia eni avikalaneni aloxo 'o, itema vile lai 'o umomomo sou u'oxonu mii vile no anu masaxa noxou vitanisi uasi manina. Lexe itema vile umasaxa u'oxonu mii vile, la anu utali'isinexu tei o.” 45 Xe tatananu tuala muavuti la mumoxo'u Iosepu no anu uala vile noxi'a ta Aixiputo. Mumoxo'u lexe Sapenati-Panea. Xe muavuti la, la muvaitaula'inu Iosepu noxie sema vile ualasie lexe Asenata, eiae Potipera 'olu. Potipera ne anu itema sou uvala suluvixa'a ta maliava no tuala vile ilemolu lexe Eliopolisi. Xe Iosepu ne muavuti la muxixaoxao sou umaisou xalexalee tuatuala ukalusi no nano ne Aixiputo.

46 Iosepu ne tauu iexu muxali loxo mavulovexa tatalu, la sou anu musokou sou muxaxai noxou tatananu tuala ne Aixiputo. Xe muavuti la mulaa no taasou sou mulai mumuamua'i no xalexalee tuatuala no nano no tuala tila ne Aixiputo mukalusi. 47 No nano no anu tauu ie muxatele tamei, la la'ilali muxali tavu'alo mo mu'oki'oki tani manina. 48 La sou Iosepu mumolo la'ilali sou mu'unanu no taataasou la'ilali no tuatuala tila vilevilesi no nano no tuala tila ne Aixiputo. No anu tuala tila vilevilesi ne, mu'unanu la'ilali molu no xaixai no pa'upa'umolu tuatuala vilevilesi ne. 49 Iosepu mumolo la'ilali tavu'alo misevile loxo io'iio'i no tasi'i. Tavu'alo tavu'alo misevile, la sou anu umomomo sou uitisou uasi.

50 Ili'i no anu tauu ie muxatele tamei sou soli toxoxa'a uxalisi'a uao, ia Iosepu ilee Asenata mipalaane'i ta 'ili'a tamei ta mulu. Asenata ane eiae Potipera 'olu. 51 La sou muvikala lexe, “Lataua musu'ulileli mole eni ieli si'isou tu'utu'umaxu ane muxali noxilo mo ieli si'isi'a mamilo ilo'a ta viivilo mo ta minuminu no tualasixe noxi'a.” La sou mumoxo'u 'olu laposalaxu ne lexe Manase. 52 Xe muavuti la muvikala la aloxo 'o, “Tava'u xo Lataua molu muxalixa'a ta 'alixeni tamei no tuala ane eni ene'e exalisou tu'utu'umaxu no anu 'o, la eni amoxo'u 'alixeni ane tameisou 'o lexe Epalaimu.”

53 Tauu ie muxatele tamei sou la'ilali mo xoluxolu lailaixe ne Aixiputo a mune'e muxali no telexu, 54 ^dmo tauu ie muxatele tamei ane sou ane'i ixolixu soli toxoxa'a a musoko aloxo Iosepu mulemolu. Soli toxoxa'a mutaasou xalexalee tuatuala mukalusi, ia no nano no tuala ne Aixiputo mu'isalili no tuatuala no xalee lia ne Aixiputo ukalusi ne la'ilali a uxolu. 55 ^eTa mitema ne Aixiputo ixoxolu xe isolixa'a, la ilai ikatu noxou tatananu tuala ne Aixiputo, la sou anu molu upalusi'a ilai noxou Iosepu sou anu uvikalane'ixu mii ane ane'i i'oxonu.

56 Mixoxoolu xe, soli toxoxa'a ne mu'oki'oki tani mo mutaasou xalexalee tuatuala ne Aixiputo ne mukalu, la sou Iosepu mukisiinu aiaitengaxu taataasou la'ilali ne mukalusi sou ta mitema mine'e milotoxa'a la'ilali. 57 Ta mitema me'a no xalexalee tuatuala mukalusi no paxapaxa ne, mine'e mixali noxou Iosepu ne Aixiputo ne sou ilotoxa'a la'ilali noxou xo soli toxoxa'a ne mu'oki'oki mo mutaasou xalexalee tuatuala ne'ei ne'ei ne mukalusi.